®PAŞA Kapital, Azərbaycanın kapital bazarlarında investorların aktiv iştirakına töhfə verəcək növbəti anderrayter layihəsi – Kapital Bank-ın 20 milyon ABŞ dolları həcmində subordinasiya istiqrazlarının ikinci tranşı üzrə abunə yazılışını həyata keçirir.
Ölkənin birinci bankı Kapital Bank-ın 2-ci tranşı üzrə yeni istiqraz yerləşdirmələri Bakı Fond Birjasında 30 təqvim günü ərzində abunə yazılışı üsulu ilə həyata keçiriləcək və yerləşdirilmə 29 oktyabr 2024-cü il tarixində yekunlaşacaq. İstiqrazların buraxılış tarixi isə 31 oktyabrda başa çatacaq.
İstiqrazların xüsusiyyətləri:
- Nominal dəyər: 100 ABŞ dolları
- Gəlirlilik faizi: İllik 7%
- Ödəniş müddəti: Aylıq
- Tədavül müddəti: 7 il
- Növ: Sənədsiz, adlı, faizli, təmin edilməmiş, subordinasiya istiqrazları
İstiqrazların buraxılması ilə əlaqədar baza emissiya prospekti, habelə istiqrazların buraxılışına dair digər şərtlərlə buradan tanış ola bilərsiniz.
Emissiyanın anderrayteri qismində “PAŞA Kapital İnvestisiya Şirkəti” QSC çıxış edir. Bu investisiya imkanından faydalanmaq istəyən investorlar PAŞA Kapital şirkətinin aşağıdakı onlayn müraciət platforması vasitəsilə abunə yazılışına qoşula bilər:
https://www.pashacapital.az/trading/kapitalbank
Qeyd edək ki, istiqrazlar subordinasiya borc şəklində, 7 illik tədavül müddəti ilə buraxılır. Subordinasiya borc öhdəlikləri – emissiya şərtlərinə görə ödəmə vaxtı çatdıqda ödənilən, bankın aktivlərinin girovu ilə təmin edilməyən, mülkiyyətçisinin tələbi ilə geri alınmayan, bank ləğv edilərkən onların ödənilməsi əmanətçilərin və bankın digər kreditorlarının tələbləri tam ödənildikdən sonra icra olunan öhdəliklər.
Xatırladaq ki, 26 sentyabr 2024-cü il tarixində PAŞA Kapital vasitəsilə həyata keçirilən Kapital Bank istiqrazlarının birinci tranşı fərdi investorlarda böyük maraq yaratmış və 1 hüquqi və 160 fiziki şəxs olmaqla, 161 investor tərəfindən 35,211,100 ABŞ dolları həcmində 171 sifariş yerləşdirilmişdir.
PAŞA Kapital İnvestisiya Şirkətinin məhsul və xidmətləri haqqında daha ətraflı məlumat üçün https://www.pashacapital.az/ saytı və ya 1548 nömrəsi ilə əlaqə saxlaya bilərsiniz.
