Peru Seçki Komissiyası dekabrın 24-ü axşam saatlarına olan məlumata görə, ölkə prezidenti seçkilərində iştirak etmək istəyən 34 namizədi qeydə alıb. “Reuters” agentliyinin məlumatına görə, bu, ölkə tarixində prezident postuna iddia edənlərin rekord sayıdır. Müqayisə üçün, 2021-ci il seçkilərində 18 namizəd iştirak edib. Peru prezident seçkilərində səsvermə 12 aprel 2026-cı il tarixinə planlaşdırılıb.
Namizədlərin yekun siyahısı martın 14-də açıqlanacaq. Bununla yanaşı, Peru qanunvericiliyinə əsasən istənilən vətəndaş “namizədə etiraz edə bilər”. Hazırda namizədlər arasında keçmiş futbolçu Corc Forsayt, məşhur komediyaçı və parodist Karlos Alvares, eləcə də ölkənin müxtəlif sabiq prezidentlərinin qohumları yer alır.
“Ipsos”un milli sorğusunun məlumatlarına əsasən, ölkə əhalisinin 48%-i kimə səs verəcəyini bilmir və ya sevimli namizədi yoxdur. Bu səbəbdən, “Reuters”in sorğuladığı analitiklərin fikrincə, seçkilərin birinci turunda aydın qalib olmayacaq. Çox güman ki, nəticələr iyunun 7-də keçiriləcək ikinci turdan sonra müəyyənləşdiriləcək.
Peruda prezident seçkiləri bu vəzifədən Dina Boluartenin oktyabrın 10-na keçən gecə impiçment proseduru nəticəsində kənarlaşdırılmasından sonra təyin olunub. Prezidentliyə namizədliyini ilk irəli sürən şəxs paytaxt Lima şəhərinin meri Rafael Lopes Aliaga olub. O, seçkilərdə iştirak etmək üçün vəzifəsindən istefa verib.
