Rusiya prezidenti Vladimir Putin Pekində Çin sədri Si Cinpinlə görüşüb. Görüşün əvvəlində Vladimir Putin bildirib ki, Çin Rusiyanın ticarət-iqtisadi sahədə əsas tərəfdaşıdır. Prezident xatırladıb ki, 2023-cü ildə ikitərəfli ticarət dövriyyəsi təxminən dörddə bir artaraq 227 milyard dollara çatıb.
Rəsmi olaraq Rusiya prezidentinin dövlət səfəri mayın 16-dan 17-dək davam edəcək. Onunla birlikdə müdafiə naziri Andrey Belousov, xarici işlər naziri Sergey Lavrov, Təhlükəsizlik Şurasının katibi Sergey Şoyqu və Yuri Uşakov danışıqlarda iştirak edəcək. Hər iki tərəfdən nümayəndə heyətlərinin bəzi üzvlərinin iştirakı ilə Putin və Si arasında qeyri-rəsmi şam yeməyi də planlaşdırılır.
Bu, Vladimir Putinin yeni prezidentlik müddəti başlayandan bəri ilk xaricə səfəridir. O, sonuncu dəfə Çinə 2023-cü ilin oktyabrında səfər edib.
