Rusiya prezidenti Vladimir Putin və Çin lideri Si Cinpin arasında danışıqlar başa çatıb. Onlar təxminən 2.5 saat davam edib və əvvəlcə qapalı, sonra isə açıq formatda keçirilib. Dövlət başçıları hərtərəfli tərəfdaşlıq və strateji qarşılıqlı fəaliyyət haqqında birgə bəyanat imzalayıblar. Sənədin özü hələ dərc olunmayıb.
Rəsmi olaraq Rusiya prezidentinin dövlət səfəri mayın 16-dan 17-dək davam edəcək. Onunla birlikdə müdafiə naziri Andrey Belousov, xarici işlər naziri Sergey Lavrov, Təhlükəsizlik Şurasının katibi Sergey Şoyqu və Yuri Uşakov danışıqlarda iştirak edəcək. Hər iki tərəfdən nümayəndə heyətlərinin bəzi üzvlərinin iştirakı ilə Putin və Si arasında qeyri-rəsmi şam yeməyi də planlaşdırılır.
Bu, Vladimir Putinin yeni prezidentlik müddəti başlayandan bəri ilk xaricə səfəridir. O, sonuncu dəfə Çinə 2023-cü ilin oktyabrında səfər edib.
