Qazaxıstan prezidenti Kasım-Jomart Tokayev ölkədə kriptovalyutaların “malların, xidmətlərin alınması və digər məqsədlər üçün” istifadə oluna biləcəyi “CryptoCity” adlı pilot zona yaratmağı planlaşdırdığını açıqlayıb. O, bunu mayın 29-30-da keçirilən Astana Beynəlxalq Forumunun plenar sessiyasında çıxışı zamanı deyib.
Tokayevin sözlərinə görə, layihə ölkənin daha geniş rəqəmsal transformasiyasının bir hissəsi olacaq. “Biz rəqəmsal transformasiyada mühüm irəliləyiş əldə etmişik ki, bu da Avrasiyanın İT mərkəzi olmaq istəyimizi əks etdirir”, – o qeyd edib.
Prezident vurğulayıb ki, Qazaxıstan əsas sektorlarda, o cümlədən rəqəmsal texnologiyalar və süni intellektdə öz mövqelərini gücləndirmək və innovativ inkişaflara xüsusi diqqət yetirmək niyyətindədir. “Məqsədimiz bir sıra xarici universitetlərin filiallarının fəaliyyət göstərəcəyi, tədqiqat və inkişaf sahəsində tərəfdaşlıqların qurulacağı akademik və innovasiya mərkəzinə çevrilməkdir”, – Tokayev əlavə edib.
