Azərbaycan Qazaxıstandan xam neft alışlarını 2025-ci ilin ilk üç rübündə 87.3 min tona yüksəldib.
Banker.az xəbər verir ki, bu da illik müqayisədə 152 faiz artım deməkdir.
İdxal edilən xam neftin dəyəri isə $48.3 mln. olmaqla illik 112 faiz artım edib.
Ötən il Qazaxıstandan ümumilikdə 34.6 min və ya $22.8 mln. həcmində xam neft alınmışdı.
Azərbaycan Mərkəzi Asiya ölkələrindən öncəki ildə də neft alışı həyata keçirirdi. Məsələn, Dövlət Statistika Komitəsinin açıqladığı keçən ilin ilk üç rübündə Türkmənistanda 131.7 min ton ($75.8 mln.) xam neft idxal etsə də, 2025-ci ildə idxal dayanıb.
Qeyd edək ki, Qazaxıstandan idxalın kəskin artması bu ölkənin neft ixracını Rusiya marşrutlarından diversifikasiya etmək strategiyasının tərkib hissəsidir.
Rusiya-Ukrayna müharibəsi və sanksiyalar fonunda Qazaxıstan Azərbaycan üzərindən nəqli aktivləşdirir. Hazırda iki ölkə arasında Bakı-Supsa boru kəməri vasitəsilə illik 3 milyon tona qədər neftin nəqli ilə bağlı danışıqlar gedir. Bu kəmər, Səngəçal terminalından başlayaraq Gürcüstanın Supsa limanına qədər uzanır və ildə təxminən 5 milyon ton neft nəql etmək gücünə malikdir. Bununla bağlı 2025-ci ilin martında hər iki ölkənin əsas neft şirkətləri bu danışıqları apardıqlarını açıqlamışdılar.
Bu əməkdaşlıq çərçivəsində Aktau-Bakı-Ceyhan marşrutu ilə 2025-ci il üçün neft tədarükünün həcminin 1,7 milyon tona çatdırılması planlaşdırılır.
Bakı-Supsa boru kəməri, 1999-cu ildə istifadəyə verilmiş və uzunluğu 827 km-dir. Kəmərin illik nəqletmə gücü 5,1 milyon ton təşkil edir.
