Azərbaycanda son illər ödəmə kartlarından istifadə fəallığı azalıb. Bu gün hər 100 nəfərdən yalnız 10 nəfəri ödəmə kartından istifadə edir. Qeyri-nağd ödəniş sistemlərinin inkişafı ölkədə çox ləng inkişaf edir. Ekspertlərin fikrincə, ölkədə bu günlə müqayisədə, qeyri-nağd ödəniş sistemində əvvəllər çox böyük aktivlik müşahidə edilirdi.
Dünya təcrübəsi göstərir ki, neqativ hallara qarşı mübarizə sahəsində ən mühüm vasitələrdən biri də bütün sahələrdə şəffaf maliyyə alətlərinin, xüsusən də qeyri-nağd ödəniş sisteminə keçidin təmin edilməsidir. İqtisadi sahədə keçid dövrünün başa çatması, ölkənin sosial-iqtisadi cəhətdən sürətlə modernləşməsi adekvat olaraq Azərbaycanda da sahibkarlıq subyektlərinin fəaliyyətində şəffaf maliyyə mexanizmlərinin tətbiqini zərurətə çevirmişdir. Şəffaflıq və hesabatlılığın təmin olunması hazırkı dövrdə özəl sektorun da inkişafının vacib elementi kimi çıxış edir. İstər ticarət, məişət, istərsə də iaşə obyektlərində qeyri-nağd ödəniş sistemlərinin tətbiq olunması ölkə iqtisadiyyatının inkişafına böyük təkan verə bilər.
Digər tərəfdən isə ticarət, iaşə və digər xidmət müəssisələrində müştərilərlə hesablaşmaların ödəniş kartları vasitəsilə aparılması, həmin ticarət müssisələrinin vergidən yayınmasına mane olur.
Bu da öz növbəsində korrupsiya və rüşvətxorluğa qarşı mübarizədə böyük rol oynayır. Inkişaf etmiş ölkələrdə plastik kartlardan daha geniş istifadə olunur. Bu kartların əsas üstünlüyü ondadır ki, insanlar külli miqdarda nağd pulu özləri ilə gəzdirmirlər. Və əlbəttə ki, bu da cibgirlik, oğurluq kimi kriminal hadisələrin azalmasına, vətəndaşların daha rahat yaşamasına şərait yaradır. Yəni insanlar özlərini daha rahat və güvənli hiss edə biləcəklər.
Qeyri-nağd ödəniş sisteminin inkişafında olan ləngimə, məhz bu sahədə əhali arasında düzgün maarifləndirmə işinin aparılmadığından yaranır.
