Qırğızıstan və Özbəkistan dövlətlərarası sərhədin delimitasiyası prosesini başa çatdırıblar, bu barədə Qırğızıstan Prezidenti Sadır Japarov bildirib. Tərəflər iki ölkə arasında hərtərəfli strateji tərəfdaşlıq haqqında bəyannamə imzalayıblar.
“Qırğızıstan və Özbəkistan dövlət sərhədinin delimitasiyası prosesini başa çatdırıb və sərhəd müqaviləsinə ratifikasiya sənədlərini mübadilə ediblər. Beləliklə, biz sərhəd məsələsinə son qoyduq”, – deyə Japarov Bişkekdə özbəkistanlı həmkarı Şavkat Mirziyoyevlə görüşündən sonra bildirib.
Banker.az bu barədə xarici mediaya istinadən xəbər verir.
Qırğızıstan rəhbəri vurğulayıb ki, Özbəkistanla əməkdaşlıq ölkənin xarici siyasətinin prioritet istiqamətlərindən biridir. Japarovun sözlərinə görə, delimitasiyanın başa çatması iki ölkə arasında “qardaşlıq münasibətlərinin inkişafında əsas rol oynayacaq” və “Mərkəzi Asiyada sabitlik və təhlükəsizliyə töhfə verəcək”.
Ötən ilin oktyabrında qəbul edilmiş sazişə əsasən, Qırğızıstan sahəsi 4.5 min hektara yaxın olan Kempir-Abad su anbarının altındakı torpaqları Özbəkistana verir və qarşılığında 19.7 min hektar əlavə torpaq alır.
Qırğızıstan müxalifəti hakimiyyəti milli maraqlara xəyanət etməkdə şübhələnərək su anbarının verilməsinə qarşı çıxıb.
