Sentyabr ayında qlobal investorlar qızıl fondlarına (ETF) 15.5 milyard dollar yatırıb ki, bu da müşahidələrin bütün tarixi ərzində ikinci ən yüksək göstəricidir. Qızılın qiymətləri mütəmadi olaraq tarixi maksimumu yeniləyərək, bir troya unsiyası üçün 3.8 min dollar səviyyəsinə yaxınlaşıb.
“Bank of America”nın hesabatında verilən məlumata görə, 24 sentyabrda başa çatan həftə ərzində qızıl ETF-lərinə xalis investisiyaların həcmi 3.6 milyard dollar təşkil edib. Bu, əvvəlki həftə daxil olmuş vəsaitlərdən 1.6 milyard dollar çoxdur. Son dörd həftədə bu cür fondlara 15.5 milyard dollar vəsait cəlb olunub ki, bu da avqustdakı 2.9 milyard dollarlıq investisiyalarla müqayisədə kəskin artımdır.
Analitiklər gözləyirlər ki, qiymətli metalın dəyəri bir unsiya üçün 4 min dolları ötəcək. “JP Morgan Private Bank”ın qlobal investisiya strateqi Veyxen Çen istisna etmir ki, gələn ilin ortalarınadək ABŞ Federal Ehtiyat Sisteminin faiz dərəcəsinin azalması fonunda qiymət 4150 dollara qədər yüksələ bilər.
