Qızıl rekord həddə qədər bahalaşıb- tarixdə ilk dəfə qiymətli metalın kotirovkaları bir troya unsiyası üçün 2100 dolları ötüb. Bu, ABŞ Federal Ehtiyat Sisteminin (FED) siyasətini tezliklə yumşaltması gözləntiləri və Yaxın Şərqdəki silahlı münaqişə fonunda baş verib.
İki aya rekord göstəricilərə doğru
Dekabrın 4-də qızılın qiyməti yeni tarixi rekorda imza atıb – “Comex” birjasında troy unsiyasının qiyməti 2140 dolları ötüb. Əvvəllər qızılın spot qiyməti heç vaxt 2100 dollardan yuxarı qalxmamışdı. Qızıl qiymətləri bu il son dərəcə dəyişkən olub, belə ki, cəmi iki ay əvvəl metalın unsiyası 1800 dollar civarında bu ilin minimumlarına yaxın ticarət edilib.
Qızıl qiymətlərindəki artım FED sədri Cerom Pauellin ötən cümə günü çıxışı ilə sürətlənib. Amerika tənzimləyicisinin rəhbəri bildirib ki, ABŞ-ın pul siyasəti “məhdudlaşdırıcı ərazidədir” və artıq iqtisadi fəallığı ləngidir. Pauellin çıxışı xəzinə istiqrazlarının azalmasına səbəb olub, çünki bazarlar onun sözlərini uçot faiz dərəcəsinin qaçılmaz azaldılması üçün mümkün siqnal kimi qiymətləndirib.
Pauellin çıxış etdiyi gün dekabrın 1-də ABŞ-ın on illik dövlət istiqrazlarının gəlirliliyi 13 baza bəndi azalıb. Bu, qızıla investisiya qoymağı spekulyativ investorlar üçün daha cəlbedici edib.
FED siyasətinin yumşaldılması gözləntisi dolların dünya ehtiyat valyutaları qarşısında ucuzlaşmasına gətirib çıxarıb ki, bu da qızılın xeyrinə olub. Noyabrda ABŞ valyutasının altı əsas valyutadan ibarət səbətə qarşı dinamikasını göstərən DXY dollar indeksi 3%-dən çox ucuzlaşıb. Bunun səbəbi qızılın ABŞ dolları ilə alqı-satqısıdır, buna görə də ABŞ valyutasının zəifliyi aktivin ölkədən kənarda alıcılıq qabiliyyətini artırır.
Qızılın qiymətinin artmasına ilk olaraq 7 oktyabrda HƏMAS-ın İsrailə hücumu təkan verib. Təkcə oktyabr ayında qiymətli metalın qiyməti təxminən 10% artıb. Qızılın qiymətinin sürətlə artmasının başqa səbəbləri də olub, xüsusən dünya mərkəzi banklarının artan tələbi. “WSG”nin məlumatına görə, birjadankənar bazar istisna olmaqla, bu ilin üçüncü rübündə qızıl tələbi son beş il ərzində orta göstəricidən 8% yuxarı olub.
2024-cü ildə nə baş verəcək
FOMC (FED-in Federal Açıq Bazar Komitəsi) üzvlərinin böyük əksəriyyəti hesab edir ki, inflyasiyanın davamlı azalması zəif iqtisadi artım dövrü və daha az sıx əmək bazarı tələb edir. Buna görə də biz FED-in uçot dərəcəsinin ən azı 2024-cü ilin ortalarına qədər hazırkı 5.25-5.5% səviyyəsində qalacağını gözləyirik. Lakin gələn ilin sonuna kimi qiymətlərin aşağı düşməsi fonunda qiymətli metalın unsiyası 2200-2250 dollara qədər bahalaşa bilər.
2024-cü ildə qızılı yüksəldəcək əsas amillər ABŞ dollarının zəifləməsi və geosiyasi gərginliyin yüksək səviyyəsi olacaq. Yaxın perspektivdə qızıl qiymətləri böyük möhtəkirlərin onun böyüməsi ilə bağlı aqressiv bahisləri səbəbindən çox dəyişkən ola bilər. Xüsusilə, son CFTC məlumatları göstərir ki, böyük möhtəkirlərin qızıl fyuçersləri və opsionlarında xalis uzun mövqeləri altı ayın ən yüksək səviyyəsinə çatıb. Bu fakt qiymətli metalın qısamüddətli dinamikasını proqnozlaşdırmağı çətinləşdirir, çünki mənfəət götürmə hər an başlaya bilər.
Texniki nöqteyi-nəzərdən, kotirovkalar bir troy unsiyası üçün 2080-dən yuxarı sabitləşərsə, qızılda artım tendensiyası davam edə bilər. Mütəxəssislər 2024-cü ilin üfüqündə qiymətlərin 2100-2300 dollar diapazonunda hərəkət etməsini proqnoz edirlər. Eyni zamanda, onların fikrincə, dolların zəifləməsi fonunda 2024-cü ilin sonuna kimi qızıl 1 unsiya üçün 2300-ə kimi bahalaşa bilər.
