ABŞ-ın iqtisadi göstəricilərinin açıqlanmasından əvvəl qızılın qiyməti rekord həddə çatıb.
Banker.az Bloomberg-ə istinadən xəbər verir ki, bu məlumatlar, keçən həftə Federal Ehtiyat Sisteminin (FED) 50 baza bəndlik faiz dərəcəsi endiriminin, daha aqressiv endirimlər seriyasının ilk addımı olub-olmadığına dair ipucları verə bilər.
Qızılın qiyməti 0.4% artaraq unsiyası $2 631.13-a çatıb və cümə günü qeydə alınan əvvəlki rekord həddi keçib. Treyderlər həftənin sonunda ABŞ-ın şəxsi istehlak xərcləri göstəricisi və işsizliklə bağlı müraciətlər kimi əsas iqtisadi məlumatlar öncəsində faiz dərəcələri ilə bağlı gözləntiləri qiymətləndirir.
FED-dən Kristofer Valler cümə günü, iqtisadiyyat onun gözləntilərinə uyğun inkişaf edərsə, noyabr və dekabr aylarında keçiriləcək növbəti iki FED iclasında hər birində 25 baz bənd endirimi dəstəkləyəcəyini bildirib. Bununla belə, əmək bazarı zəifləyərsə, yarım faiz bəndi endirim də ehtimal edilə bilər.
Yenə də rallinin həddindən artıq uzandığına dair işarələr var. Qızılın 14 günlük nisbi güc indeksi (RSI) təxminən 70 səviyyəsindədir ki, bu səviyyə bəzi investorlar tərəfindən artıq alınıb-satılma (overbought) kimi qiymətləndirilir. Əmtəə Fyuçers Ticarət Komissiyasının (Commodity Futures Trading Commission) son məlumatlarına görə, hedc fondları və spekulyatorlar “Comex”də artan qiymət mərcləri ilə uzun müddətli qızıl mövqelərini son dörd ilin ən yüksək həddinə çatdırıblar.
“Artan momentum danılmazdır, lakin yaxın perspektivdə ehtiyatlı olmaq lazımdır” — deyə “Oversea-Chinese Banking Corp.”un foreks strateqi Kristofer Von1 bildirib və əlavə edib ki, texniki dəstək $2 580/unsiya ətrafında ola bilər.
Qızıl həmçinin Yaxın Şərqdə artan gərginliyin təsiri ilə təhlükəsiz liman tələbindən də dəstək görür. Treyderlər Hizbullah və İsrail arasındakı münaqişənin daha geniş regional qarşıdurmaya çevrilməsi ilə bağlı narahatlıqları izləyirlər.
Qızılın qiyməti 0.3% artaraq unsiyası $2 629.14-a çatıb, keçən həftə isə 1.7% artım qeydə alınıb. “Bloomberg Dollar Spot” İndeksi stabil qalıb. Gümüş, palladium və platinin qiyməti isə eniş yaşayıb.
