2024-cü ilin birinci rübündə qlobal borc 1.3 trilyon dollar artaraq rekord 315.1 trilyon dollara çatıb, Banker.az bu barədə xarici mediaya istinadən xəbər verir.
Covid-19 pandemiyasının başlanmasından bəri qlobal borc 21% və ya 54.1 trilyon dollar artıb.
Bu gün qlobal borcun ən böyük payı qeyri-maliyyə korporasiyalarının (94.1 trilyon dollar) payına düşür, dövlət borclanması isə (91.4 trilyon dollar) ikinci yerdədir. Maliyyə sektorunun borcu 70.4 trilyon dollar, ev təsərrüfatlarının borcu isə 59.1 trilyon dollardır.
İnkişaf etməkdə olan bazarlar üçün artan borc yükü ciddi risklər yaradır. Ölkə yüksək faiz dərəcəsi mühitində ləng iqtisadi artım yaşayırsa, bu risklər xüsusilə yüksəkdir. Belə bir ssenaridə, bir çox inkişaf etməkdə olan ölkələr borclarını yenidən strukturlaşdırmağa ehtiyac duya bilər.
İnkişaf etməkdə olan ölkələrin təxminən üçdə birinin hələ də pandemiyadan sağalmaması və adambaşına düşən gəlirlərinin 2019-cu ildə müşahidə olunan səviyyədən aşağı olması vəziyyəti daha da pisləşdirir. 2024-cü ilin birinci rübündə inkişaf etməkdə olan bazarların borcu son 10 ildə 55 trilyon dollar artaraq 105 trilyon dollara çatıb.
