“Reuters” agentliyinin sorğusuna əsasən, may ayında OPEC ölkələrinin neft hasilatı son iyirmi ildən çox müddətdə ən aşağı səviyyəyə enib. Buna ABŞ-nin dəniz blokadasının İranın ixracını azaltması və İranın Hörmüz boğazını faktiki olaraq bağlamasının Fars körfəzi regionundakı digər istehsalçıların ixracını kəskin məhdudlaşdırması səbəb olub.
Araşdırmanın nəticələrinə görə, Neft İxrac Edən Ölkələr Təşkilatının (OPEC) 11 üzv ölkəsində neft hasilatı əvvəlki ayla müqayisədə gündəlik 1,06 milyon barel azalaraq 16,13 milyon barelə düşüb.
“Reuters”in sorğularına əsasən, bu göstərici ən azı 2000-ci ildən bəri ən aşağı aylıq səviyyədir və hətta 2020-ci ildə COVID-19 pandemiyası dövründə tələbatın kəskin azalması zamanı qeydə alınan səviyyələrdən də aşağıdır.
Bu statistikaya mayın 1-dən etibarən OPEC-dən çıxmış BƏƏ daxil edilməyib.
Araşdırmanın nəticələrinə görə, ən böyük azalma ABŞ-nin aprelin 13-də başladığı blokadanın təsirlərini əks etdirən İranda qeydə alınıb.
İranın neft və kondensat ixracı ən azı son altı ilin minimum səviyyəsinə enib.
Araşdırmada iştirak edən mənbələrin məlumatına görə, Səudiyyə Ərəbistanında da tədarüklər azalmağa davam edib. Bununla belə, İraq daxili tələbatın artması hesabına hasilatı artırmağa nail olub.
Venesuela və Nigeriya da hasilatı artıran ölkələr sırasında yer alıb.
OPEC-in müttəfiqlərini, o cümlədən Rusiyanı birləşdirən OPEC+ qrupunun səkkiz üzvü may ayında hasilatı artırmaq barədə razılığa gəlsə də, İranla müharibə və ABŞ-nin tətbiq etdiyi blokada bu planların reallaşmasına imkan verməyib.
“Reuters”in sorğusu LSEG maliyyə qrupunun neft axınları üzrə məlumatlarına, Kpler kimi digər monitorinq şirkətlərinin məlumatlarına, eləcə də neft şirkətləri, OPEC və məsləhətçi qurumlardakı mənbələrin təqdim etdiyi informasiyalara əsaslanıb.
