Oktyabrın 15-də Rusiya Xarici işlər nazirinin müavini Andrey Rudenko ilə Avropa İttifaqının (Aİ) Cənubi Qafqaz üzrə xüsusi nümayəndəsi Toyvo Klaar arasında telefon danışığı olub.
Rusiya XİN-in saytına istinadən xəbər verilir ki, tərəflər Dağlıq Qarabağ münaqişə zonasında oktyabrın 10-da Moskvada əldə olunmuş humanitar atəşkəs rejimindən sonrakı vəziyyəti müzakirə ediblər.
Onlar hərbi hərəkətlərin davam etməsindən və itkilərdən narahatlıqlarını ifadə ediblər. Bundan əlavə, münaqişə tərəflərini Moskva razılaşmasının bütün bəndlərinə, ilk növbədə atəşin dayandırılmasını, dayanıqlı yoxlama mexanizminin yaradılmasını və ATƏT Minsk Qrupunun səyləri çərçivəsində substantiv danışıqların aktivləşdirilməsini nəzərdə tutan müddəalara əməl etməyə çağırıblar.
