Rusiya vasitəçilər üzərindən Yaponiyadan aviasiya yanacağı idxal etməyi planlaşdırır. Bu, Ukraynanın Rusiyanın enerji infrastrukturuna hücumları nəticəsində yaranmış yanacaq böhranı ilə əlaqədardır.
İki mənbə bildirib ki, iyulun ilk yarısında Yaponiyanın Tiba şəhərindən ən azı 200 min barel aviasiya yanacağının göndərilməsi gözlənilir. Yanacaq əvvəlcə Cənubi Koreyaya çatdırılacaq, daha sonra isə ehtimal ki, Yeosu limanında başqa tankera yüklənərək Rusiyaya göndəriləcək. Yükün son təyinat məntəqəsi hələ müəyyən edilməyib.
Adının açıqlanmasını istəməyən mənbələr KİV-ə şərh vermək səlahiyyətlərinin olmadığını vurğulayıblar.
Rusiyanın Energetika Nazirliyi şərh sorğusuna cavab verməyib. Cənubi Koreyanın Sənaye Nazirliyi də məsələ ilə bağlı şərh verməkdən imtina edib. Yaponiyanın İqtisadiyyat, Ticarət və Sənaye Nazirliyi isə hələlik açıqlama təqdim etməyib.
Gəmilərin hərəkətini izləyən məlumatlara əsasən, 2022-ci ilin fevralında Cənubi Koreyadan Vladivostoka 22 min barel həcmində oxşar aviasiya yanacağı partiyası göndərilmişdi.
Ukrayna pilotsuz uçuş aparatlarının Rusiya neft emalı zavodlarına və anbarlarına hücumları nəticəsində yaranmış yanacaq böhranı ölkə üçün ciddi problemlər yaradır. Moskva yanacaq alışına məhdudiyyətlər tətbiq edib ki, bu da fermerlər arasında kənd təsərrüfatı mövsümünün pozula biləcəyi ilə bağlı narahatlıqları artırır.
Analitik şirkət Kpler-in məlumatına görə, Rusiyanın aviasiya kerosini ixracı bu il əsasən Türkiyəyə olmaqla gündəlik 13 min barelə qədər azalıb. Müqayisə üçün, ötən il bu göstərici gündə təxminən 30 min barel təşkil edirdi.
