“Samsung” şirkəti “Galaxy Unpacked” təqdimatı çərçivəsində yeni Galaxy S25, S25+ və S25 Ultra smartfonlarını təqdim edib. Qeyd edək ki, bu, “Samsung”un 2025-ci ildəki ilk təqdimatıdır.
Galaxy S25 və S25 Plus
Hər iki smartfon Qualcomm Snapdragon 8 Elite prosessoru, Dynamic AMOLED 2X ekranı (S25-də 6.2 düym, S25 Plus-da 6.7 düym) və 12 Gb operativ yaddaşla təchiz olunub. Ekran ölçülərindən başqa bu iki modeli bir-birindən fərqləndirən daha bir cəhət batareya tutumudur – S25-də 4000 mAh, S25 Plus-da isə 4900 mAh.
Hər iki model sələflərindən daha yüngül və nazikdir – S25 162 qram 7.2 mm, S25 Plus isə 190 qram 7.7 mm.
“The Verge”nin verdiyi məlumata görə, həm S25, həm S25 Plus fotoların daha sürətli redaktəsi daxil olmaqla, “Galaxy AI” süni intellekt sisteminin yeni funksiyalarını dəstəkləyir. Hər bir smartfonun korpusu IP68 standartına uyğun olaraq toz və nəmdən qorunub.
Galaxy S25 və S25 Plus dörd rəngdə təqdim edilib – tünd-göy (Navy), gümüşü (Silver Shadow), açıq-göy (Icy Blue) və yaşıl (Mint). ABŞ-də qiymətlər aşağıdakı kimidir:
S25 128 GB / 256 GB – $799 və $859
S25 Plus 256 GB / 512 GB – $999 və $1119
Galaxy S25 Ultra
Stiluslu Galaxy S25 Ultra da Snapdragon 8 Elite prosessoru üzərində işləyir, 12 GB operativ və 1 TB-a qədər daxili yaddaşı dəstəkləyir. Modelin batareya tutumu 5000 mAh, ekran ölçüsü isə 6.9 düym təşkil edir. S25 Ultra təqdim edilən smartfonlar arasında ən ağırıdır – onun çəkisi 232 qramdır.
Galaxy S25 Ultra-nın qiyməti 2/256 GB, 12/512 GB və 12/1 TB konfiqurasiyasına uyğun $1539, $1659 və $1905 təşkil edir. Qeyd edək ki, hər üç modelin satışları fevralın 7-də başlayacaq, “TechCrunch” yazır.
