Çin və ABŞ arasında ticarət münasibətlərindəki qeyri-müəyyənlik fonunda Şanxay və Şençjen fond birjalarının əsas indeksləri müvafiq olaraq 1,95% və 3,04% aşağı düşüb.
Ticarət məlumatlarına əsasən, “Shanghai Composite” indeksi 3 839,75 bəndə, “Shenzhen Component” isə 12 688,94 bəndə qədər enib.
Hər iki birjanı əhatə edən “CSI 300” “blue chips” indeksi 2,26% azalaraq 4 514,23 bənd səviyyəsində bağlanıb. Ən çox azalma elektrik təchizatı, fotoelektrik və külək enerjisi avadanlıqları, yarımkeçiricilər, elektron komponentlər, istehlak elektronikası və akkumulyator istehsalı sektorlarında qeydə alınıb.
Son bir həftə ərzində Çin fond bazarlarında ABŞ ilə ticarət gərginliyinin artması səbəbindən dəyişkənlik müşahidə olunur.
Oktyabrın 9-da Çin Ticarət Nazirliyi nadir torpaq metalları və əlaqəli texnologiyaların ixracına nəzarətin sərtləşdirilməsi ilə bağlı iki sənəd dərc edib.
Oktyabrın 10-da ABŞ prezidenti Donald Tramp bəyan edib ki, Vaşinqton noyabrın 1-dən və ya daha tez Çin məhsullarına tətbiq olunan gömrük rüsumlarını 100% artıracaq və proqram təminatına ixrac nəzarəti tədbirləri tətbiq edəcək.
O, həmçinin Çinə digər malların, xüsusilə aviasiya texnikası üçün ehtiyat hissələrinin tədarükünə məhdudiyyətlər tətbiq oluna biləcəyi barədə xəbərdarlıq edib və oktyabr-noyabr aylarında Koreya Respublikasında keçiriləcək APEC sammitində Si Cinpinlə görüşün ləğvi ehtimalını da istisna etməyib.
