Çinin sədri Si Cinpin Pekində Fransa Prezidenti Emmanuel Makronla danışıqlar aparıb. Tərəflər beynəlxalq siyasət və ticarət prinsiplərinə dair fikir ayrılıqlarını aradan qaldırmağa çalışıblar. Bu, cənab Makronun böyük biznes nümayəndə heyəti ilə Çinə artıq dördüncü səfəridir.
Si Cinpin dünyanın “son yüz ildə görünməmiş miqyaslı dəyişikliklər yaşadığı” bir zamanda fransız həmkarını məsuliyyət və qətiyyət nümayiş etdirməyə çağırıb. “Bəşəriyyət yenidən yolayrıcında dayanıb, hara gedəcəyinə qərar verir. Çin və Fransa məsuliyyət və qətiyyət göstərməli, çoxqütblülük bayrağını uca tutmalı, qaranlıq və dumanı yarıb keçməli, tarixin doğru tərəfində möhkəm dayanmalıdır”, — deyə Si Cinpin bildirib.
Fransa Prezidenti qeyd edib ki, Fransa və Çin mövqelərini yaxınlaşdırmalıdırlar. “Bəzən fikir ayrılıqları yaranır, amma biz onları ümumi xeyir naminə aradan qaldırmağa məsuliyyət daşıyırıq”, — deyə o bildirib. O həmçinin Çin Ukraynada atəşkəsin əldə olunmasına “həlledici imkanlarla” təsir göstərə biləcəyinə işarə edib.
“Reuters” xəbər verir ki, söhbət həmçinin Aİ-nin ticarət qaydalarını sərtləşdirmək niyyətinə də toxunub. Agentliyin məlumatına görə, Pekin güclü subsidiyalaşdırılmış elektromobil sektoruna görə Brüssel ilə ticarət gərginliyinin azaldılmasını istəyir. Bundan əlavə, müzakirələrdə Çin tərəfindən 500 ədəd “Airbus” təyyarəsinin alınması barədə razılaşma da olacaq. Agentliyin qiymətləndirməsinə görə, Si Cinpin bu müqaviləni imzalamayacaq.
Çin Fransa üçün yeddinci ən böyük ticarət tərəfdaşıdır və Çin gömrüyünün məlumatlarına əsasən, hər il təxminən 35 milyard dollar dəyərində mal alır.
