Sinqapur Ticarət Nazirliyi cümə günü 2025-ci il üçün iqtisadi artım proqnozunu avqust ayında verilmiş əvvəlki 1,5–2,5% aralığından 4%-ə qaldırıb. Gözləntilərin yüksəlməsinə üçüncü rübdə qeydə alınan daha yüksək göstəricilər (4,2% artım) səbəb olub. Ölkənin Maliyyə Nazirliyi istehsal, topdansatış ticarəti və maliyyə xidmətləri sahələrində əldə olunan uğurları vurğulayıb.
Elektronika klasteri 6,1% artıb. Buna yarımkeçiricilərə, serverlərə və süni intellekt (Sİ) üçün komponentlərə olan kəskin tələbat səbəb olub. Topdansatış ticarəti sektorundakı artım əsasən maşın avadanlıqlarının yüksək satış həcmləri ilə bağlıdır ki, bu da yenə Sİ ilə bağlı elektronikalara qlobal tələbatın yüksək olması ilə əlaqələndirilir. Bio-tibbi məhsulların, o cümlədən dərman preparatlarının istehsalı 8,9% yüksəlib.
ABŞ və Çin arasında ticarət atəşkəsinin 2026-cı ilin noyabrına qədər uzadılmasından sonra “son aylarda ticarət gərginliyinin daha da azalması” artıma töhfə verib. Eyni zamanda, ABŞ prezidenti Donald Tramp tərəfindən yarımkeçiricilər və dərman preparatları üzrə tariflərin tətbiqi “əvvəl gözlənildiyindən daha yavaş şəkildə” həyata keçirilir, məlumatda bildirilir.
2026-cı il üçün nazirlik daha təvazökar proqnoz verib — qlobal iqtisadiyyatın zəifləməsi gözlənildiyindən artım tempi 1–3%-ə qədər yavaşıyacaq. Bu isə ABŞ-nin tarif siyasətinin nəticələrinin daha qabarıq hiss olunacağı ilə izah olunur.
