Azərbaycanda könüllü əmlakın yanğından və digər risklərdən sığortası sahəsində cari ilin ilk səkkiz ayında artım müşahidə edilib.
Banker.az bunu Azərbaycan Mərkəzi Bankının statistik bülletenindən istinadən xəbər verir.
2024-cü ilin eyni dövründə sığorta haqları 47,4 mln manat təşkil edərkən, 2025-ci ildə bu rəqəm 54,6 mln manata çatıb. Bu, yığımın illik müqayisədə 15,3% artdığını göstərir.
Ödənişlər isə əks tendensiya nümayiş etdirib. 2024-cü ildə 2,56 mln manat olan ödənişlər 2025-ci ildə 1,82 mln manata düşüb, yəni 28,9% azalma qeydə alınıb.
Son illər üzrə zərərlilik əmsalına baxdıqda, 2021-ci ilin ilk səkkiz ayında ödənişlərin haqlara nisbəti 9,3% idi. 2022-ci ildə bu göstərici kəskin azalıb və 2,9%-ə düşüb, 2023-cü ildə isə kəskin artaraq 35,8% olub. 2024-cü ildə yenidən azalma müşahidə olunub və zərərlilik 5,4%-ə geriləyib.
2025-ci ildə isə əmsal 3,3%-ə enərək son illərin ən aşağı səviyyəsinə düşüb.
