“Standard & Poor’s Global Ratings” beynəlxalq reytinq agentliyi Çinin xarici və milli valyutalarda öhdəlikləri üzrə uzunmüddətli suveren reytinqlərini “A+” və “A-1” səviyyəsində təsdiqləyib. Proqnoz “stabildir”, agentlik bildirib.
“Stabil” proqnoz S&P analitiklərinin Çin iqtisadiyyatının növbəti bir neçə il ərzində 4%-dən çox artım tempinə qayıdacağı ilə bağlı fikirlərini əks etdirir. Bu, xalis dövlət borcunun daha kiçik illik artımına kömək edəcək.
Çinin real ÜDM-in 2023-cü ildə 5.2% artdıqdan sonra bu il 4.8% artacağı gözlənilir. Ekspertlər 2025 və 2026-cı illərdə iqtisadiyyatın 4.6%, 2027-ci ildə isə 4.4% artacağını gözləyirlər.
Ekspertlər 2024-2027-ci illərdə adambaşına düşən ÜDM-in orta illik artımını 4.5-5% intervalında proqnozlaşdırırlar. Nəticədə, bu müddətin sonuna qədər göstərici 16 min dolları keçəcək.
Həmçinin yaxın gələcəkdə işsizliyin tədricən azalması gözlənilir: bu il 5%-ə, gələn il 4.9%-ə, 2026-2027-ci illərdə isə 4.8%-ə qədər.
Agentliyin ekspertlərinin fikrincə, ölkədə istehlak qiymətləri 2024-cü ildə 0.5%, 2025-ci ildə 1.5%, 2026-cı ildə 1.9%, 2027-ci ildə isə 2.1% artacaq. Çin milli valyutasının orta məzənnəsinin bu il 7.2 yuan/dollar, 2025-ci ildə 6.98 yuan, 2026-cı ildə 6.88 yuan, 2027-ci ildə isə 6.78 yuan civarında olacağı gözlənilir.
