Beynəlxalq reytinq agentliyi “S&P Global Ratings” Fransanın uzunmüddətli suveren kredit reytinqini — həm xarici, həm də milli valyutada — “AA-” səviyyəsindən “A+” səviyyəsinə endirib. Agentliyin yaydığı press-relizdə bildirilir ki, proqnoz hələlik “sabit” olaraq qalır. Qısamüddətli reytinqlər də “A-1+” səviyyəsindən “A-1” səviyyəsinə endirilib.
2026-cı il dövlət büdcə layihəsi parlamentə təqdim olunsa da, agentliyin analitikləri Fransanın dövlət maliyyəsi ilə bağlı qeyri-müəyyənliyin hələ də yüksək olduğunu vurğulayırlar.
Fransa üzrə reytinqin yenidən nəzərdən keçirilməsi əvvəlcə 28 noyabr tarixinə planlaşdırılsa da, bu proses ölkə hökumətinə etimadsızlıq səsvermələri ilə bağlı vəziyyətə görə planlaşdırılandan daha tez həyata keçirilib. S&P qeyd edir ki, bu siyasi proseslər Fransanın dövlət maliyyəsinin konsolidasiyası üzrə irəliləyişini çətinləşdirir.
Agentliyin məlumatına görə, “sabit” proqnoz artmaqda olan dövlət borcu və siyasi konsensusun olmaması ilə ölkənin kredit imkanları arasında mövcud tarazlıqla izah olunur. S&P mütəxəssisləri Fransanın ÜDM-nin 2025-ci ildə 0,7%, 2026-cı ildə isə təxminən 1% artacağını proqnozlaşdırırlar.
