“Bloomberg” şirkətin redaksiyanın tanış olduğu açıqlamasına istinadən yazır ki, “SpaceX” təxminən 800 milyard dollar dəyərlə səhmlərin satışına başlayıb və 2026-cı ildə səhmlərin ilkin kütləvi yerləşdirilməsinə (IPO) hazırlaşdığını təsdiqləyib. Səhmlər 421 dollar qiymətə satılır ki, bu da iyul ayında müəyyən edilmiş qiymətdən demək olar ki, iki dəfə yüksəkdir. Həmin vaxt “SpaceX” bir səhm üçün 212 dollar qiymətindən satışdan sonra 400 milyard dollar dəyər qiymətləndirməyə çatmışdı.
“Reuters” “SpaceX”in maliyyə direktoru Bret Consenin səhmdarlara ünvanladığı məktubdan sitat gətirir:
“Biz şirkəti 2026-cı ildə mümkün IPO-ya hazırlayırıq. Onun həqiqətən baş tutub-tutmayacağı, nə vaxt və hansı qiymətləndirmə ilə keçiriləcəyi hələ də qeyri-müəyyəndir. Lakin ideya ondan ibarətdir ki, əgər biz işimizi mükəmməl görsək və bazarlarda şərait əlverişli olsa, açıq yerləşdirmə əhəmiyyətli həcmdə vəsait cəlb edə bilər”.
Consenin sözlərinə görə, mümkün IPO zamanı cəlb ediləcək vəsait “Starship” raketlərinin buraxılışlarının artırılmasına, süni intellekt üçün kosmosda data-mərkəzin yerləşdirilməsinə, Ayda bazanın tikintisinə, eləcə də Marsa pilotsuz və pilotlu missiyaların göndərilməsinə yönəldiləcək.
“The Wall Street Journal” mənbələrə istinadən yazır ki, “SpaceX” artıq IPO ilə bağlı məsləhətlər üçün Uoll-Strit banklarının seçilməsi prosesinə başlayıb. Mənbələrin sözlərinə görə, banklar bu həftə ilkin təkliflərini təqdim etməlidirlər.
“Bloomberg”in məlumatına görə, şirkət 30 milyard dollardan çox vəsait cəlb etməyi planlaşdırır. Bu halda “SpaceX”in IPO-su tarixdə ən iri IPO olacaq və 2019-cu ildə 29 milyard dollar cəlb etmiş “Saudi Aramco”nu geridə qoyacaq. “Reuters” isə mənbəyə istinadən bildirir ki, “SpaceX” 25 milyard dollardan çox vəsait cəlb etmə imkanını nəzərdən keçirir və IPO 2026-cı ilin iyununda baş tuta bilər.
İlon Mask da “SpaceX”in 2026-cı ildə IPO planlarını nəzərdən keçirdiyini təsdiqləyib.
Səhmlərin satışı nəticəsində 800 milyard dollar qiymətləndirmə ilə “SpaceX” dünyanın ən bahalı özəl şirkəti olacaq. Hazırda bu status ChatGPT çat-botunun yaradıcısı olan “OpenAI”yə məxsusdur — oktyabr ayında onun qiymətləndirməsi 500 milyard dollara çatıb.
