İnvestorlarla keçirilən ilk görüşlərdən sonra “SpaceX” birjaya çıxış (IPO) çərçivəsində ən azı 75 milyard dollar cəlb etməyi planlaşdırır. Bu barədə məsələdən xəbərdar olan iki mənbəyə istinadən “Reuters” məlumat yayıb.
Agentliyin məlumatına görə, şirkət “greenshoe” opsionu da daxil olmaqla 1,75 trilyon dollar dəyərində qiymətləndirilməni hədəfləyir. Bu mexanizm investor tələbi gözləntiləri üstələdiyi halda anderrayterlərə əlavə səhmlər satmağa imkan verir. Adətən bu əlavə paket yerləşdirmənin 15%-nə qədər olur.
2026-cı ilin may ayının sonunda “Bloomberg”in mənbələri şirkətin ən azı 1,8 trilyon dollar dəyərində qiymətləndirməyə yönəldiyini bildirmişdi. Apreldə isə agentlik 2 trilyon dollarlıq qiymətləndirmədən bəhs etmişdi. “SpaceX” “Reuters”in sorğusuna cavab verməyib.
Bununla yanaşı, “Morningstar” analitikləri şirkətin dəyərini 780 milyard dollar səviyyəsində qiymətləndirirlər. Ekspertlərin fikrincə, yerləşdirmədən sonra səhmlər qısamüddətli perspektivdə bahalaşa bilər, lakin uzunmüddətli dövrdə investorların onları daha cəlbedici qiymətlərlə almaq imkanı yaranacaq.
“SpaceX” 2026-cı ilin may ayının sonunda IPO üçün ictimai ərizə təqdim edib. Şirkət ilkin kütləvi yerləşdirməni “Nasdaq” birjasında SPCX tikeri altında keçirməyi planlaşdırır, lakin dəqiq tarixi açıqlamayıb. “Reuters”in mənbələrinin sözlərinə görə, IPO 12 iyun 2026-cı ildə baş tuta bilər.
