“Sumqayıt Tekstil” MMC-nin özəlləşdirilməsi üzrə investisiya müsabiqəsində cəmiyyətin dövlətə məxsus və ümumi dəyəri 10 mln. 112 min manat olan 101.120 payı satışa çıxarılıb.
Banker.az xəbər verir ki, İqtisadiyyat Nazirliyi yanında Əmlak Məsələləri Dövlət Xidməti “Azərbaycan Respublikasında dövlət əmlakının özəlləşdirilməsinin II Dövlət Proqramı”na və “İnvestisiya müsabiqəsinin keçirilməsi Qaydaları”na uyğun olaraq, “Sumqayıt Tekstil” Məhdud Məsuliyyətli Cəmiyyətinin (MMC) dövlətə məxsus 100%-lik paylarının satışı üzrə investisiya müsabiqəsi elan edir.
Sumqayıt şəhəri, Sülh küçəsi, 3 ünvanında yerləşən “Sumqayıt Tekstil” MMC-nin özəlləşdirilməsi üzrə investisiya müsabiqəsində ümumi dəyəri 10 mln. 112 min manat olan 101.120 payı satışa çıxarılıb. Müəssisənin 346.641 manat həcmində öhdəlikləri var.
“Sumqayıt Tekstil” MMC-nin özəlləşdirilməsi üzrə keçiriləcək investisiya müsabiqəsində iştirak etmək üçün iddiaçılar investisiya qoyuluşunun istiqamətləri, məbləği və müddəti göstərilməklə ümumi həcmi 8 mln. manatdan az olmayan investisiya proqramı təqdim etməli, yeni iş yerlərinin yaradılması, mövcud tikili, qurğuların bərpası və yenidənqurulması, tekstil üzərində işləmələrə dair yeni texnologiyaların tətbiqi, infrastruktur təminatının təkmilləşdirilməsi ilə bağlı təkliflərini verməlidir.
Müsabiqənin qalibi cəmiyyətdəki dövlət payının alınmasına görə dövlət büdcəsinə 4 mln. manatdan az olmayan məbləğdə vəsaitin ödənilməsini təmin etməlidir. Müsabiqənin qalibi həmçinin, nəticələr təsdiq olunduğu tarixdən 30 gün müddətində alqı-satqı müqaviləsini imzalamalı, təklif etdiyi pul vəsaitini müqavilədə qeyd olunmuş müddətdə dövlət büdcəsinə köçürməli, ümumilikdə müqavilə ilə müəyyən olunan şərt və öhdəlikləri yerinə yetirməlidir.
Müsabiqədə ölkə vətəndaşları və xarici investorlar iştirak edə bilərlər.
İnvestisiya müsabiqəsinə çıxarılan dövlət əmlakı ilə https://clck.ru/34Z68N linki vasitəsilə tanış olmaq olar:
İddiaçıların ərizə və təkliflərinin qəbulu 6 iyul 2023-cü il tarixinədək iş günləri saat 10:00-dan 17:30-dək Əmlak Məsələləri Dövlət Xidmətində (ünvan: Bakı şəhəri, Nizami rayonu, Heydər Əliyev prospekti, 139) aparılacaqdır.
Komissiya tərəfindən müsabiqə təkliflərinin qiymətləndirilməsi Dövlət Xidmətinin inzibati binasında 7 iyul 2023-cü il saat 15:00-da həyata keçiriləcəkdir.
