Süni intellekt çipləri istehsalçısı “Cerebras Systems” 8.1 milyard dollar dəyərində qiymətləndirmə fonunda investorlarından 1.1 milyard dollar vəsait cəlb edib. 2024-cü ildə şirkət IPO üçün müraciət etmişdi, lakin ABŞ tənzimləyicisinin yoxlamaları səbəbindən listinq təxirə salınmışdı.
“Bloomberg”in məlumatına görə, maliyyələşdirmə raunduna “Fidelity Management & Research”, “Atreides Management”, “Tiger Global” və ABŞ prezidenti Donald Trampın oğlunun tərəfdaş olduğu “1789 Capital” fondu rəhbərlik edib.
“Cerebras Systems”in baş direktoru Endryu Feldman bildirib ki, cəlb olunmuş vəsait məlumat emalı mərkəzlərinin şəbəkəsinin genişləndirilməsinə, həmçinin aparat və proqram təminatının inkişafına yönəldiləcək. Onun sözlərinə görə, “Cerebras Systems”in çipləri süni intellekt modelləri ilə işləyərkən “Nvidia” həllərindən “bir neçə dəfə daha yüksək” məhsuldarlıq göstərir.
Şirkət həmçinin “Meta” və “Mistral AI” kimi müştərilərə uzaqdan hesablama xidmətləri təqdim edir. Hazırda “Cerebras Systems” Atlantada, Vankuverdə və Monrealdə yeni data-mərkəzlər inşa edir və ABŞ hakimiyyətindən avadanlıqlarının ixracına icazə aldıqdan sonra Yaxın Şərq ölkələrindən birində də tikinti işlərinə başlamağı planlaşdırır.
