“Swatch” şirkəti ABŞ prezidenti Trampın İsveçrə mallarına tətbiq etdiyi yeni rüsumlara istinad edən xüsusi saat seriyasını təqdim edib. Dizaynerlər siferblatda 9 və 3 rəqəmlərinin yerlərini dəyişərək vizual olaraq 39 rəqəmini göstəriblər. Qeyd edək ki, İsveçrə mallarına, o cümlədən saatlara idxal rüsumu 39%-dir.
Şirkət bu saatları “What if… tariffs?” adlandırıb və onları yalnız İsveçrə ərazisində 139 İsveçrə frankına (175 ABŞ dolları) satır. “Reuters”ə açıqlama verən Swatch nümayəndəsi bildirib ki, şirkət ümid edir: bu model İsveçrə hökumətinə hərəkətə keçmək siqnalı olacaq, çünki indiyədək ABŞ-nin milli məhsullara tətbiq etdiyi rüsum dərəcələrinin azaldılmasına nail olunmayıb.
ABŞ hakimiyyəti xarici ticarət tərəfdaşlarının məhsullarına dair yeni rüsumları 31 iyul 2025-ci ildə elan edib. 7 avqustdan ABŞ idxal olunan İsveçrə mallarına əlavə olaraq 39% rüsum tətbiq olunur. Bundan başqa, polad və alüminium məhsullarına 50%, avtomobillər və ehtiyat hissələrinə 25%, mis məhsullarına isə 50% rüsum qüvvədədir.
