Yalnız siz və ucsuz-bucaqsız dünya! Hansısa şəhər və yaxud əcnəbi ölkəyə səyahət dedikdə ağıla gələn ən son şey tək səyahət etməkdir. Dostların əhatəsində istirahət etmək kimlərəsə daha maraqlı və şən görünə bilər. Lakin tək səyahət etməyin də özünəməxsus xüsusiyyətləri var.
Güzəştə getməli olmayacaqsınız. Tək səyahət edərkən öz arzularınız və yol yoldaşınızın arzuları arasında seçim etməli olmayacaqsınız. Ürəyinizin istədiyini seçin və edin! İstədiyiniz zaman yatın, gəzintiyə çıxın, öz istədiyiniz yerləri görməyə gedin.
Heç kimi gözləməli olmayacaqsınız. Hər bir insanın öz həyat tempi var. Bir şəxs səhər tezdən durub 10 dəqiqəyə özünü qaydaya sala bildiyi halda, digərinə bunun üçün yarım saat tələb oluna bilər. Tək səyahət edərkən heç kimi gözləməli olmayacaq, əsəbləşməyəcək və gecikməyəcəksiniz. Öz ritminizlə səyahət edə bilərsiniz.
Öz düşüncələrinizlə baş-başa qala bilərsiniz. Bəzən ətrafda baş verən hadisələr insanı ruhən gərgin vəziyyətə gətirərək qərar vermə prosesini ləngidir. Bir həftə meditasiya etmək, ətraf mühitə, yeni ərazilərə və möhtəşəm mənzərələrə köklənmək beyni lazımsız fikirlərdən təmizləməyə və beyini yenidən yükləməyə kömək edəcək.
Yeni insanlarla tanış olmaq daha asan olacaq. Hər hansı bir oteldə qalarkən, restoran, yaxud kafedə əyləşərkən, parkda gəzərkən, siz mütləq çoxsaylı insanlarla əhatə olunacaqsız. Tək səyahət etməyiniz səbəbilə insanlara daha açıq olacaqsınız.
Daha cəsarətli və müstəqil olacaqsınız. Kompaniya daxilində səyahət edərkən, daim dostunuza arxalana bilərsiniz. Tək səyahət edərkən isə hər şeyə görə təkbaşına cavabdehsiniz. Öz davranışalrınızı planlaşdırmaq və onlara görə cavab verməli olacaqsınız. Hər hansı bir problem ilə də üzləşdikdə onu müstəqil olaraq həll etməli olacaqsınız.
Nəyə qadir olduğunuzu öyrənəcəksiniz. Tək səyahət edərkən özünüzdə əvvəllər bilmədiyiniz keyfiyyətləri kəşf edəcəksiniz. Bu zaman əhəmiyyətli dərəcədə vacib təcrübə əldə edəcək, yeni insanlarla tanış olacaq və öz gücünüzü sınaqdan keçirəcəksiniz. Geri döndükdə isə tək başına necə böyük yol qət etdiyinizin fərqində olacaqsınız.
