Cənubi Koreya prezidenti Mun Çje İn Şimali Koreya lideri Kim Çen Inla danışıqlar aparmaq üçün Pxenyana gəlib.
Banker.az AzVision-a istinadən məlumat verir ki, Çje İnin təyyarəsi Şimali Koreyanın paytaxtı Pxenyan yaxınlığındakı Sunan hava limanına enib. Onu şəxsən Kim Çen In özü qarşılayıb. Pxenyana səfərində Çje İni müşayiət edən xanımını isə Şimali Koreya liderinin həyat yoldaşı qarşılayıb.
3 gün ərzində Pxenyanda qalacaq Çje İn Şimali Koreya lideri ilə 2 dəfə danışıqlar aparacaq. Müzakirələrin mövzusu ikitərəfli münasibətlərin yaxşılaşdırılması və gələcək inkişafı, Koreya yarımadasının nüvəsizləşdirilməsi və regiondakı gərginliyin azaldılması, həmçnin, Şimali Koreyanın ABŞ-la dialoqunun inkişafı məsələləri olacaq.
Qeyd edək ki, bu, Cənubi Koreya prezidentinin son 11 ildə Şimali Koreyaya ilk səfəridir. Sonuncu dəfə 2007-ci ilin oktyabrında Cənubi Koreya prezidenti No Mun Hyon Pxenyana səfər etmişdi.
