“TikTok” sosial media bazarında lider mövqeyi ilə “Google”un axtarış sistemi məkanında üstünlüyünə meydan oxumağı hədəfləyir. Şirkət məhsulların fotoşəkillə axtarışı funksiyasını sınaqdan keçirir. Bu seçim ABŞ və Cənub-Şərqi Asiyadakı bütün istifadəçilər üçün əlçatandır.
Tutaq ki, restoranda yeməyin verildiyi boşqab xoşunuza gəldi. “TikTok Shop”da oxşar məhsulları tapmaq üçün “TikTok” tətbiqini aça və onun şəklini çəkə bilərsiniz. Daha aşağı qiymətə oxşar bir şey tapmaq üçün şəkli saxlaya və sonra onu tətbiqə yükləyə bilərsiniz.
Bu yenilik vasitəsilə şirkət təkcə “Google” və ya “Amazon” ilə deyil, həm də “Klarna” kimi axtarış alətləri təklif edən digər şirkətlərlə rəqabət aparmaq istəyir.
Şirkət ABŞ-də potensial qadağaya baxmayaraq, e-ticarət fəaliyyətini genişləndirir. Aprel ayında prezident Bayden “TikTok”u qadağan edən qanun layihəsini imzalayıb.
