“Apple” şirkətinin rəhbəri Tim Kuk İndoneziya prezidenti Coko Vidodo ilə görüşüb, ölkəyə mümkün investisiyalar və Çindən kənar tədarüklərin diversifikasiyası məsələlərini müzakirə edib. Səfər ABŞ prezidenti Co Bayden administrasiyasının qlobal texnoloji təchizat zəncirində digər Asiya tərəfdaşlarının rolunu gücləndirmək səyləri kontekstində baş tutub.
Kuk İndoneziya bazarının “Apple” üçün əhəmiyyətini qeyd edib və ölkədə istehsalın inkişaf etdirilməsində maraqlı olduğunu bildirib. O, həmçinin şirkətin İndoneziyada inkişaf etdirici akademiyalarını genişləndirmək, o cümlədən Bali adasında yeni obyekt tikmək planlarını açıqlayıb.
İndoneziya Rabitə və İnformasiya Texnologiyaları Nazirliyinin sözçüsü bildirib ki, Kukun səfəri “Apple”ın ölkədə yeni sərmayələr yatırmasına, o cümlədən smartfon fabrikinin tikintisinə səbəb ola bilər. Hazırda şirkətin İndoneziyada hələ rəsmi mağazası yoxdur.
