ABŞ-nin prezident administrasiyası dünyanın ən böyük çip istehsalçılarından biri olan “Intel” ilə şirkətdə pay almaq barədə danışıqlar aparır, bu barədə “Bloomberg” və “The Wall Street Journal” yazıb.
Bildirilir ki, bu ideya avqustun 11-də ABŞ prezidenti Donald Tramp və “Intel” şirkətinin baş direktoru Lip-Bu Tan arasında keçirilən görüşdə müzakirə edilib. “Bloomberg” mənbələri mümkün sövdələşmənin “Intel”in Ohayoda planlaşdırdığı zavodun tikintisinə dəstək verəcəyini bildirib.
Sövdələşmənin təfərrüatları hələ müzakirə olunur və hökumətin əldə edə biləcəyi payın ölçüsü bəlli deyil, agentlik danışıqların razılığa gəlmədən başa çata biləcəyini etiraf edir. Mütəxəssislərə görə, sövdələşmə 2025-ci ilin ikinci rübündə 2.9 milyard dollar zərər etmiş “Intel”in maliyyə vəziyyətini gücləndirəcək.
Tramp və Lip-Bu Tanın görüşü respublikaçının şirkətin rəhbərini istefaya çağırmasından bir neçə gün sonra baş tutub. Trampın çağırışından sonra şirkət ABŞ-nin milli maraqlarına və iqtisadi təhlükəsizliyinə sadiq olduğunu bildirib.
