ABŞ prezidenti Donald Tramp Ağ Evdə Cənubi Koreya prezidenti Li Çje Myonla görüş zamanı onun qələmini dəfələrlə tərifləyib. Buna cavab olaraq Li Çje Myon həmin qələmdən birini Trampa hədiyyə edib. Bu barədə Maeil Business Newspaper yazır.
Hadisədən dərhal sonra Cənubi Koreyanın dəftərxana ləvazimatları istehsal edən Monami şirkətinin səhmləri kəskin bahalaşıb — 30% artaraq bir səhm üçün 2575 vona ($1,85) yüksəlib. Müqayisə üçün, 25 avqust 2025-ci il ticarət sessiyasının sonunda qiymət 1971 von ($1,41) idi.
Bununla belə, nəşr qeyd edir ki, Trampa hədiyyə edilən qələmin məhz hansı istehsalçıya aid olduğu məlum deyil. Cənubi Koreya prezident administrasiyası bildirib ki, həmin qələm Li Çje Myonun xüsusi sifarişi əsasında əl işi kimi hazırlanıb.
