Donald Tramp administrasiyası Venesuela sularında “BP” və “Shell” qaz layihələri üçün lisenziyaları ləğv edib. Bu yataqlardan gələn tədarüklər Trinidad və Tobaqo Respublikasının iqtisadiyyatı üçün vacib olan nəhəng mayeləşdirilmiş təbii qaz mənbəyidir.
Qərar ABŞ-nin Venesuela prezidenti Nikolas Maduroya təzyiq göstərmək üçün iqtisadi və diplomatik tədbirlərdən istifadə etmək cəhdididir. Lisenziyalar “Shell Dragon” və “BP Cocuina-Manakin” layihələrinə aiddir.
“BP” və “Shell” Venesuela yaxınlığındakı qazla zəngin sularda inkişafı genişləndirməyə çalışır, Trinidad və Tobaqo hökumətinin sahib olduğu lisenziyaların ləğvi isə bu planları pozur.
Trinidad və Tobaqonun lisenziyalarının ləğvi ABŞ-nin Venesuelanı təcrid etmək üçün digər şirkətlərə qarşı gördüyü oxşar tədbirlərdən biridir. Keçən ay ABŞ Maliyyə Nazirliyi Venesuelanın “Chevron”, “Repsol”, “Eni” və “Global Oil Terminals” üçün tətbiq etdiyi istisnaları ləğv edib.
Sanksiyaların sərtləşdirilməsi fonunda Maduro çərşənbə axşamı günü axşam saatlarında iqtisadi fövqəladə vəziyyət elan edən fərman imzalayıb, o cümlədən bələdiyyə vergilərinin yığımının dayandırılmasını və idxal əvəzinə yerli məhsulların alınmasını tələb edən tədbirləri açıqlayıb.
Maduro sənədi imzalayarkən deyib: “Beynəlxalq şəraiti və ticarət müharibəsinin dünyaya və Venesuelaya təsirini nəzərə alaraq, bütün sektorları qorumaq üçün bu fərmanla mənə verilən konstitusiya səlahiyyətlərinə müraciət edirəm”. ABŞ Maliyyə Nazirliyi, Venesuela hökuməti və “BP” məsələ ilə bağlı heç bir şərh bildirməyib.
