“Financial Times”in “S&P Global”ın hesablamalarına istinadən yazdığına görə, ABŞ-nin “böyük altılıq” bankları — “JPMorgan Chase”, “Bank of America”, “Citigroup”, “Wells Fargo”, “Goldman Sachs” və “Morgan Stanley” — 2025-ci ilin yekunlarına əsasən ümumi bazar kapitallaşmasını 600 milyard dollar artırıblar. İlin əvvəlində onların ümumi kapitallaşması 1,77 trilyon dollar idisə, hazırda bu göstərici 2,37 trilyon dollara çatıb. FT-nin sorğuladığı ekspertlər bank səhmlərinin bahalaşmasını Donald Tramp administrasiyasının iri maliyyə korporasiyaları üçün tənzimləyici tələbləri azaltması ilə izah edirlər.
2008-ci il maliyyə böhranından sonra ABŞ hakimiyyət orqanları maliyyə sektorunun tənzimlənməsini kəskin şəkildə sərtləşdirmişdi. Qlobal miqyasda problemlərə səbəb olan bu sahədə kapitalın adekvatlığına, stress-testlərin keçirilməsinə, hesabat standartlarına, borclanma səviyyəsinə və kredit siyasətinə dair tələblər gücləndirilmişdi. Lakin son illərdə, xüsusilə Donald Trampın hakimiyyətə gəlişindən sonra, tənzimləyicilər maliyyə sənayesinə nəzarəti yumşaltmağa başlayıblar. “Səhmlərin qiymətləri üçün tənzimləyici dəyişikliklərin nə qədər əhəmiyyətli olduğunu qiymətləndirməmək olmaz”, — deyə FT “Royal Bank of Canada” (RBC) analitiki Cerard Kessidini sitat gətirir.
Bu il ABŞ tənzimləyici qurumları ölkənin ən böyük banklarında daha yüksək borclanma səviyyəsinə icazə verib, banklar üçün illik stress-testləri yenidən nəzərdən keçirib və yüksək riskli aktivlərin kreditləşdirilməsinə dair tövsiyələri ləğv ediblər. Nəticədə “Citigroup”un səhmləri “böyük altılıq” arasında ən yaxşı göstərici nümayiş etdirərək il ərzində təxminən 70% bahalaşıb. İkinci yerdə isə səhmləri 60% artan investisiya bankı “Goldman Sachs” qərarlaşıb.
