ABŞ Prezidenti Donald Trampın Vyetnama tətbiq etdiyi 46 faiz rüsum siyasəti dünyanın ən nəhəng idman geyimi korporasiyası “Nike”ın məhsullarının qiymətlərini bahalaşdıracaq.
Bu barədə “The New York Post” yazıb.
Məhsullarının təqribən yarısını Vyetnamda istehsal edən “Nike”ın “Air Jordan 1 High” ayaqqabısını almaq istəyənlər yeni tarif aprelin 9-da qüvvəyə mindikdən sonra cari 180 dollar qiymətinə əlavə olaraq 18 dollar ödəməli olacaqlar.
Nəşr “Footwear News”a istinadən brendin digər populyar ayaqqabılarının 15-35 dollar bahalaşacağını bildirib.
Maliyyə nəhəngi UBS-in qiymətləndirmələrinə görə, istehlakçılar Vyetnamdan gətirilən malların qiymətlərində 10-12 % artım görəcəklər.
Anonim qalmaq istəyən sahə üzrə ekspert “Nike” ayaqqabılarının mayasının dəyərinə diqqət çəkib. O, “Nike Air Force 1”ı misal çəkərək sözügedən ayaqqabının şirkətə 18 dollara başa gəldiyini, 115 dollara isə satıldığını açıqlayıb.
“Vyetnama tətbiq edilən 46 % rüsum hər cüt üçün ümumi xərcə əlavə 8,28 dollar əlavə edəcək ki, bu da 8 000-ə vurulduqda – yəni bir yük konteynerinə yerləşdirilə bilən idman ayaqqabılarının sayına – böyük məbləğ təşkil edir”, – nəşr qeyd edib.
Lakin şirkətin bu xərcləri azaltmaq üçün öz fabrikləri ilə danışıqlar aparacağı gözlənilir. Bundan başqa, rüsumların ölkələr razılaşma əldə etdikcə dəyişə biləcəyi istisna edilmir.
“Bu rüsumlar qalarsa, yayda müflisləşmələr başlanacaq”, – sözügedən sənayedəki mənbə deyib.
Korporasiya mümkün artımlarla bağlı açıqlama verməyib.
Geyim sahəsindəki müəssisələrə kredit təqdim edən “Hilldun” şirkətinin baş direktoru “NY Post”a bildirib ki, Çində istehsalat aparan əksər brendlər son bir neçə il ərzində təchizat zəncirlərini diversifikasiya etməyə çalışıblar. Onun sözlərinə görə, Vyetnam brendlərin istehsalatı köçürməyə çalışdığı ölkələrdən biri olub. Lakin tətbiq edilən rüsumlar diversifikasiya üzrə bütün səyləri əhəmiyyətli dərəcədə zəiflədib.
“Nike”, ola bilsin, öz “Sadəcə bunu et” şüarını “Sadəcə daha çox ödə”yə dəyişməli olacaq”, – deyə qəzet hadisələri şərh edib.
