ABŞ fond bazarında kəskin günlük dönüş baş verib və əsas indekslər son iki ayın ən aşağı səviyyəsinə düşüb. Banker.az xəbər verir ki, Uol-Strit treyderləri gözlənilməz satış dalğasının səbəblərini anlamaqda çətinlik çəkiblər.
Banker.az xəbər verir ki, 100 texnoloji şirkətin səhmlərini ölçən NASDAQ gün ərzində 2,4%, 500 ən iri şirkətin səhmlərini ölçən S&P 500 isə 1,6% ucuzlaşıb; bazarın ümumi dəyəri 2,7 trilyon dollar azalıb.
Analitiklər satışların bir neçə amillə bağlı olduğunu bildirirlər: süni intellekt layihələrinin gəlirliliyinə dair suallar, möhkəm əmək bazarı haqqında yeni hesabatın FED-in faiz endirimlərini dayandıra biləcəyi ilə bağlı narahatlıq, bitkoinin altı ayın minimumuna düşməsi və opsionların vaxtının yaxınlaşması fonunda artan volatillik.
NASDAQ-100 oktyabr rekordundan bəri 7,9% geriləyib. İndeksin əsas çəkisi olan “Nvidia” 3,2% dəyər itirərək günlük maksimumundan 400 milyard dollara yaxın kapitalizasiya silib. S&P 500 isə sentyabrdan bəri ən aşağı səviyyədə bağlanıb və ilk dəfə 100 günlük orta göstəricinin altına düşüb. Riskli aktivlərdə satışlar güclənib: qısa mövqelərin üstünlük təşkil etdiyi səhmlər 3,5%, zərərli texnoloji şirkətlər 3,7% geriləyib. 5000 kiçik şirkətin səhmlərini ölçən “Russell Microcap”in ümumi itkisi 10%-ə çatıb.
Volatillik indeksləri də yüksəlib: Nasdaq 100-ün gözlənilən dəyişkənlik göstəricisi 32-ni keçib, VXN isə 3,1 trilyon dollarlıq böyük opsion həftəsi ərəfəsində kəskin artıb.
Bazar ekspertləri hesab edir ki, investorları həm Sİ sektorunda gəlirlilik sualları, həm də qiymətləndirmələrin yüksəkliyi narahat edir. CTA fondlarının mövqelərinin həssas olması və mexaniki satışların bir neçə gün davam edə bilməsi də əlavə təzyiq yaradır. Ümumilikdə, analitiklər ABŞ bazarında qısamüddətli sabitləşmə üçün daha çox siqnala ehtiyac olduğunu bildirirlər.
