Türkiyənin kredit reytinqi endirildi, lirə ucuzlaşacaq

Türkiyədə dolların məzənnəsində bahalaşma müşahidə oluna bilər.

Buna səbəb “Moody’s” Beynəlxalq Reytinq Agentliyinin bu gün səhər saatlarında Türkiyənin kredit reytinqini “Ba1” səviyyəsindən “Ba2″yə endirməsidir.

Belə ki, “Moody’s” açıqlamasında Türkiyənin yüksək cari balans kəsiri, xarici borc və geosiyasi problemlərlə üzləşdiyini, dünya bazarlarında faizlərin artma ehtimallarının Türkiyənin xarici şok riskini artırdığını bildirib. Agentlik 2017-ci ildə Türkiyənin dövlət borcunun ÜDM-ə nisbətinin 28% təşkil etdiyini, “Ba1” kateqoriyasında olan ölkələrdə isə bu əmsalın orta hesabla 46% olduğunu qeyd edib.

“Moody’s”in açıqlamasından sonra Türkiyədə dolların məzənnəsi 3,80 lirə səviyyəsini ötüb. İlin sonuna qədər məzənnənin 4 TRY/USD səviyyəsini ötməsi proqnozlaşdırılır.

“Report”un analitik qrupu 2020-ci ilə qədər məzənnənin 5 TRY/USD, 2022-ci ilə qədər isə 6 TRY/USD səviyyəsini ötəcəyini ehtimal edir.