“Ziraat Bank Azərbaycan” ASC qiymətli kağızlar bazarında irihəcmli istiqraz buraxmağı planlayır.
Banker.az xəbər verir ki, Türkiyə kapitallı bank tərəfindən tərtib olunmuş və rəhbərlik tərəfindən imzalanmış Baza Emissiya Prospektinə əsasən, qurum ümumi nominal dəyəri 30 milyon Azərbaycan manatı təşkil edən faizli, təmin edilməmiş, sənədsiz və adlı istiqrazlar buraxacaq.
Sənəddə əks olunan rəsmi göstəricilərə görə, bank Bakı Fond Birjasında hər birinin nominal dəyəri 100 manat olan 300 000 ədəd istiqraz təklif edir. Qiymətli kağızların tədavül müddəti 1 il olaraq müəyyən edilib.
İstiqrazlar üzrə illik faiz dərəcəsi (kupon) hər bir konkret buraxılışın Yekun Şərtlərində dəqiq qeyd olunacaq. Qanunvericiliyə uyğun olaraq, gəlirlərin hesablanması ildə günlərin sayı 360 gün əsas götürülməklə aparılacaq və faiz ödənişləri hər 3 təqvim ayından bir (rüblük əsasda) investorlara ödəniləcəkdir.
Vergi şərtlərinə gəldikdə, qüvvədə olan qanunvericiliyə əsasən, fiziki şəxslərin bu istiqrazlardan əldə edəcəyi faiz gəlirləri 2028-ci ilin fevral ayının 1-dək vergidən tam azaddır. Hüquqi şəxs olan investorların faiz gəlirlərindən isə ödəmə mənbəyindən 10 faiz dərəcəsi ilə vergi tutulması nəzərdə tutulur.
“Ziraat Bank Azərbaycan” ASC-nin rəsmi bəyanatına görə, bu emissiyadan əldə olunacaq vəsaitlər bəzi spesifik risklərin sığortalanmasından və ya alternativ mənfəət mənbələrindən tamamilə fərqli hədəflərə xidmət edir. Emissiyanın əsas məqsədi bank üçün əlavə və dayanıqlı maliyyə resurslarının formalaşdırılması, qurumun dövriyyə vəsaitlərinin genişləndirilməsi və ümumi likvidlik səviyyəsinin daha da yüksəldilməsidir. Bu strateji tədbir bankın fəaliyyətində dayanıqlığı təmin etməklə yanaşı, ortamüddətli dövr üçün qarşıya qoyulmuş inkişaf və kreditləşmə planlarının uğurla reallaşdırılmasına birbaşa dəstək verəcəkdir.
Bankın cəmi aktivləri 2024-cü ilin sonundakı 920.3 milyon manatdan 2025-ci ilin yekununda 1 milyard 362.5 milyon manata (qədər yüksəlmişdir. 31 mart 2026-cı il tarixinə olan ən son prudensial hesabata görə isə aktivlərin həcmi rekord həddə – 1 milyard 442.7 milyon manata çatmışdır. Eyni trend müştərilərə verilən kredit və avanslarda da izlənilir; 2024-cü ildə 515.3 milyon manat olan kredit portfeli, 2025-ci ildə 742.2 milyon manata, 2026-cı ilin ilk rübündə ise 774.6 milyon manata bərabər olub.
