Ukrayna koronavirus əleyhinə “Pfizer” vaksininin 1 milyon dozasını tədarük edəcək.
Bu barədə “Hromadske”yə müsahibəsində Ukraynanın baş sanitar həkimi Viktor Lyaşko bildirib.
Onun sözlərinə görə, rəsmi Kiyev COVAX-dan əlavə olaraq “Pfizer” vaksininin 1 milyon dozasının ayrılması haqqında təsdiqi alıb.
Lyaşko qeyd edib ki, preparat Ukraynaya iyunun sonuna kimi tranşlarla çatdırılmalıdır.
O, həmçinin yaxın vaxtlarda ölkəyə nə qədər COVID-19 vaksinlərinin çatdırılacağını da açıqlayıb. Həkimin sözlərinə görə, Ukrayna tərəfi “Covishield” (“AstraZeneca” şirkətinin Hindistanda istehsal edilmiş koronavirus əleyhinə preparatı-red) vaksininin 500 min dozasını alıb.
“Müqaviləyə görə martın sonuna kimi 1 milyon doza çatdırılmalı idi. Sonra isə 500 min və daha 1 milyon doza. İndi Hindistanda vaksinlərin ixracatına müvəqqəti qadağa var, amma biz təlaşa düşmürük, çünki indi eyni platformadan COVAX mexanizmi çərçivəsində yeni vaksin gətirilir”, – Lyaşko bildirib.
Qeyd edək ki, Ukraynada əhalinin “Oxford/AstraZeneca” vaksini ilə koronavirusdan peyvənd olunması fevralın 24-də başlanılıb.
