15 C
Baku
Friday, March 29, 2024

Şəmsəddin Hacıyevin istintaqa çağırılması ilə bağlı rəsmi açıqlama

“Hesablama Palatası tərəfindən Azərbaycan Dövlət İqtisad Universitetində (ADİU) müvafiq yoxlama aparılıb və yoxlama materialı Baş prokuror yanında Korrupsiyaya qarşı Mübarizə Baş İdarəsinə göndərilib. Faktla bağlı cinayət işi başlanıb, hazırda intensiv istintaq tədbirləri həyata keçirilir”. APA-nın xəbərinə görə, bunu Baş prokurorun müavini, Baş prokuror yanında Korrupsiyaya qarşı Mübarizə Baş İdarəsinin rəisi Kamran Əliyev deyib.

İdarə rəisi bildirib ki, hansı vəzifəli şəxslərin məsuliyyətə cəlb olunması istintaqın nəticələrindən asılı olacaq və bu barədə obyektiv qərar qəbul ediləcək.

Baş prokurorun müavini “ADİU-nun keçmiş rektoru, millət vəkili Şəmsəddin Hacıyevin istintaqa çağırılıb?” sualına cavab olaraq deyib ki, konrekt olaraq hansı şəxslərin istintaq zamanı dindirilməsi barədə məlumat vermək iqtidarında deyil: “Gəlin hadisələri qabaqlamayaq, hazırda istinaq gedir.
İstintaq zamanı təkcə dindirmələrdən söhbət getmir. Biz müvafiq olaraq istintaq çərçivəsində bəzi rəqəmləri dəqiqləşdirmək üçün yoxlamalar təyin etmişik. Sənədlərin götürülməsi ilə də bağlı istintaq hərəkətləri aparılır”.

Azərbaycan Dövlət İqtisad Universitetində dövlət büdcəsindən ayrılan vəsaitlərin və büdcədənkənar daxilolmaların proqnozlaşdırılması və icrasının auditinin nəticəsinə dair Hesablama Palatasından daxil olmuş material Baş prokuror yanında Korrupsiyaya qarşı Mübarizə Baş İdarəsində araşdırılıb.

İlkin araşdırma zamanı yoxlama dövrünü əhatə 18 may 2012-ci ildən 1 aprel 2014-cü il tarixədək olan müddət ərzində universitetin vəzifəli və digər maddi-məsul şəxsləri tərəfindən vəzifə səlahiyyətlərindən sui-istifadə edilərək təhsil haqlarının uçotu, yığılması və bank hesabına köçürülməsi, təhsil haqqı üzrə debitor-kreditor borclarının uçotda əks etdirilməsi ilə bağlı ağır nəticələrə səbəb olan ciddi qanun pozuntularına yol verilməsi, eləcə də külli miqdarda vəsaitin uçotdan yayındırılmasına əsaslı şübhələr müəyyən edildiyindən fakta görə Cinayət Məcəlləsinin 308.2 (vəzifə səlahiyyətlərindən sui-istifadə ağır nəticələrə səbəb olduqda) və 179.3.2-ci (şəxs tərəfindən öz qulluq mövqeyindən istifadə etməklə külli miqdarda etibar edilmiş özgə əmlakını talama) maddələri ilə cinayət işi başlanıb.

Son xəbərlər
Digər xəbərlər