Dünyada USDT steyblkoininin istifadəçi sayı 500 milyona çatıb. USDT-ni buraxan “Tether” şirkətinin rəhbəri Paolo Ardoino bunu “maliyyə əlçatanlığı sahəsində ən böyük nailiyyət” adlandırıb.
“The Block” nəşri öz hesablamalarına istinadən bildirir ki, USDT-nin emissiya dəyəri 182 milyard dollar təşkil edir. İkinci ən böyük steyblkoin isə USDC adlanır — onun emissiya həcmi 75 milyard dollardır.
2025-ci ilin sentyabrında “Bloomberg” mənbələri xəbər vermişdi ki, “Tether” investorlarla 500 milyard dollarlıq qiymətləndirmə ilə 20 milyard dollar cəlb etmək barədə danışıqlar aparır. Agentliyin qeyd etdiyinə görə, bu sövdələşmədən sonra USDT-nin emitenti “OpenAI” və “SpaceX” kimi dünyanın ən bahalı özəl şirkətləri sırasında ola bilər.
Şirkət həmçinin 2025-ci ilin sonuna qədər ABŞ bazarı üçün USAT adlı yeni steyblkoin buraxmağı planlaşdırır. Bu rəqəmsal valyuta yerli tənzimləmələrə uyğun olacaq, dollarla təmin ediləcək və emitent şirkət ABŞ-də qeydiyyatdan keçəcək (hazırda “Tether” El Salvador Respublikasında qeydiyyatdadır).
