Venesuela ABŞ-nin “Overseas Oil Company” və “Crossover Energy Holding” şirkətləri ilə qarşılıqlı anlaşma memorandumu imzalayıb. Sazişlərin imzalanma mərasimi Miraflores prezident sarayında prezidentin səlahiyyətli nümayəndəsi Delsi Rodrigesin iştirakı ilə keçirilib.
“ABŞ və Venesuelanın maraqları üst-üstə düşür və biz qarşılıqlı tamamlayıcılığa əsaslanaraq hər iki xalqın rifahına töhfə verə bilərik”, — deyə Rodriges Venezolana de Televisión telekanalına açıqlamasında bildirib.
O, ABŞ sahibkarlarından ibarət nümayəndə heyətini salamlayıb və onlardan ABŞ prezidenti Donald Trampa Venesuelanın ABŞ ilə uzunmüddətli münasibətlər qurmağa hazır olduğu barədə məlumat çatdırmağı xahiş edib.
Prezidentin nümayəndəliyinin mətbuat xidmətinin məlumatına görə, Rodrigesin, dövlət neft-qaz şirkəti “Petróleos de Venezuela S.A.” (PDVSA) rəhbərliyinin və karbohidrogenlər nazirliyinin ABŞ nümayəndə heyəti ilə görüşünün əsas məqsədi enerji, dağ-mədən sənayesi və ticarət sahələrində konstruktiv əməkdaşlığın gücləndirilməsi olub. Bu əməkdaşlıq qarşılıqlı hörmət prinsipləri əsasında inkişaf etdirilir.
