Venesuela sakinləri hiperinflasiya səbəbindən malları və xidmətləri steyblkoinlərlə ödəməyə başlayıblar. Qeyd edək ki, hökumət 2024-cü ilin oktyabrında Venesuela bolivarının məzənnəsini dəstəkləməyi dayandırıb: “Bloomberg”in hesablamalarına görə, o vaxtdan bəri milli valyuta 356% dəyər itirib.
“Cointelegraph” qeyd edir ki, 2025-ci ilin sentyabrında ölkədə bir neçə dollar məzənnəsi mövcuddur: dövlət müəssisələrinin bağlı olduğu Mərkəzi Bankın rəsmi məzənnəsi, “qara” valyuta bazarı və kriptobirjaların məzənnəsi.
“Reuters”in mənbələrinin məlumatına görə, Venesuela hökuməti 2024-cü ilin iyunundan etibarən özəl sektorda USDT-dən istifadəyə icazə verib. Bu qərar ABŞ-nin neft ixracına yeni sanksiyalar tətbiq etməsindən sonra qəbul edilib, çünki bu sanksiyalar ölkədə dollar təklifini azaldıb.
Mənbələrin sözlərinə görə, kriptovalyutaları, o cümlədən USDT-ni yalnız bəzi banklar və hökumət tərəfindən təsdiqlənmiş kriptocüzdana sahib şirkətlər sata bilərlər. “Reuters” qeyd edir ki, dövlət neft şirkəti PDVSA da steyblkoinlərlə əməliyyatlara başlayıb.
“Ledn” kriptoservisinin qurucusu Maurisio Di Bartolomeo əlavə edib: “Steyblkoinlərlə demək olar ki, hər şey ödənilir – kommunal xidmətlərdən tutmuş mühafizə və ya bağban xidmətlərinə qədər. Bolívarı isə həvəssiz qəbul edirlər və dərhal dollar və ya USDT-yə dəyişməyə çalışırlar”. Onun sözlərinə görə, steyblkoin müəyyən mənada cəmiyyətin müxtəlif təbəqələri arasında maliyyə bərabərləşdiricisinə çevrilib.
Karakasda mağaza sahibləri gəlirlərini qorumaq və rəqiblərdən geri qalmamaq üçün kriptovalyutanı qəbul edirlər, baxmayaraq ki, dəyişmə zamanı pulun bir hissəsini itirirlər.
Hiperinfasiya üçün zəmin hələ 2000-ci ildə yaranmağa başladı: prezidentlər Uqo Çaves və Nikolas Maduro borcları və kəsirləri gücləndirmək, idarə azaltmaq üçün pul çap edir və neft sənayesini siyasi prinsiplərlə idarə edirdilər.
Nəticədə iqtisadiyyat dayanıqlılığını itirdi və idxaldan asılı vəziyyətə düşdü. 2017-ci ildə tətbiq edilən ABŞ sanksiyaları ölkəni dünya neft bazarından “ayırdı” və yerli şirkətlərin biznes əməliyyatlarını məhdudlaşdırdı.
