🔴ABŞ Venesuelaya zərbələr endirib, Maduro ölkədə fövqəladə vəziyyət elan edib – Yenilənir

14:13 – ABŞ-nin hava zərbələri nəticəsində Venesuelanın müdafiə naziri Padrine Lopesin ölməsi xəbərinin yalan olduğu üzə çıxıb.

Padrine Lopes videomüraciət yayaraq, təslim olmayacaqlarını, qələbə qazanacaqlarını bildirib: “Biz danışıqlara getməyəcəyik, təslim olmayacağıq və nəhayət qələbə çalacağıq”.

13:24 – ABŞ-nin Federal Mülki Aviasiya İdarəsi (FAA) ölkənin kommersiya təyyarələrinin Venesuela üzərində istənilən yüksəklikdə uçuşuna qadağa qoyub.

Bu barədə RBK “The New York Times”a istinadən bildirib.

Qadağa yerli vaxtla saat 2:00-dan qüvvəyə minib və 23 saat ərzində qüvvədə olacaq.

13:05 – ABŞ-nin hava zərbələri nəticəsində Venesuela müdafiə nazirinin həlak olması xəbəri yayılıb.

Zərbələrdən sonra Venesuela Prezidenti Nikolas Maduronun harada olduğu da hələlik bilinmir.

12:20 – ABŞ Prezidenti Donald Tramp Venesuela daxilindəki hədəflərə, o cümlədən hərbi obyektlərə zərbələr endirilməsini əmr edib.

Bu barədə CBS News məlumat yayıb.

11:46 – ABŞ Hərbi Hava Qüvvələri Venesuela müdafiə naziri Vladimir Padrino Lopezin evinə zərbə endirib.

Bu barədə xarici KİV məlumat yayıb.

Prezident Nikolas Maduronun ölkədə fövqəladə vəziyyət elan edilməsi barədə fərman imzaladığı bildirilir.

Məlumata görə, ABŞ raketlərindən biri Karakasdakı sursat anbarına düşüb.

Bir qədər əvvəl prezident Nikolas Maduro Çinin xüsusi nümayəndəsi ilə görüşüb. Prezident sarayına gedən yollar bağlanıb.

Kolumbiya prezidenti Qustavo Petro Venesuelaya hücumla bağlı BMT-nin və Amerika Dövlətləri Təşkilatının təcili iclaslarının çağırılmasını istəyib.

Vaşinqton xüsusi əməliyyat barədə hələlik rəsmi açıqlama verməyib. ABŞ Ordusunun nümayəndəsi də ABŞ-ın hücumunu şərh etməyib.

10:42 – Venesuelada partlayışlar qeydə alınıb.

Venesuelanın paytaxtı Karakas üzərində hava hücumu ilə bağlı həyəcan siqnalları çalınır.

Məlumata görə, paytaxda bir çox istiqamətlərdə partlayış səsləri eşidilir, şəhərdə elektrik enerjisi kəsilib.

Bəzi mənbələr partlayışların hava hücumu nəticəsində baş verdiyini iddia edir.