“Visa” ilk dəfə olaraq ABŞ-də öz ödəniş şəbəkəsinin iştirakçıları arasında hesablaşmalar üçün USDC steyblkoinindən istifadəyə icazə verib. Artıq banklar vəsaitləri bir-birinə ənənəvi bank infrastrukturundan istifadə etmədən, Solana blokçeynində birbaşa USDC ilə köçürə bilərlər. Yeni imkandan ilk istifadə edənlər “Cross River Bank” və “Lead Bank” olub.
Söhbət kart əməliyyatlarından sonra bank-emitentlər və ekvayerlər arasında aparılan yekun qarşılıqlı hesablaşmalardan (klirinq) gedir. Ənənəvi olaraq “Visa” şəbəkəsində bu cür hesablaşmalar üç iş gününə qədər vaxt aparır, halbuki blokçeyn texnologiyası onların demək olar ki, dərhal və fasiləsiz, o cümlədən həftəsonları həyata keçirilməsinə imkan verir. Gələcəkdə “Visa” USDC-nin emitenti olan “Circle” şirkətinin üzərində işlədiyi “Arc” blokçeynini də prosesə qoşmağı planlaşdırır.
“Cross River Bank”da bildiriblər ki, bu cür həllərə fintex və kriptovalyuta şirkətləri tərəfindən böyük maraq var. Bank nümayəndəsinin sözlərinə görə, bu mexanizmlər gələcəkdə sahə üçün standart halına gələcək.
ABŞ-dən kənarda “Visa” vasitəsilə USDC ilə aparılan illik hesablaşmaların həcmi artıq 3,5 milyard dolları keçib. Bundan əvvəl şirkət banklar, fintexlər və ticarət platformaları üçün steyblkoinlərlə işə dair qlobal məsləhət proqramını da işə salıb.
