ABŞ-nin Rusiya, İran, Venesuela, Şimali Koreya və Çinə qarşı sanksiyaları və ixrac nəzarəti onların iqtisadi resurslarını məhdudlaşdırmaq məqsədi daşıyıb. Lakin bunun əvəzinə, bu, qlobal kölgə iqtisadiyyatının yaranmasına gətirib çıxarıb, “The Wall Street Journal” (WSJ) yazır. Qəzetin qeyd etdiyi kimi, Amerika sanksiyalarına məruz qalan ölkələr maliyyə müharibəsində ABŞ-yə tab gətirə biləcək kifayət qədər inkişaf etmiş iqtisadiyyata malik ticarət bloku yaradıblar.
WSJ yazır ki, ABŞ-nin Rusiya, İran, Venesuela, Şimali Koreya, Çin və “digər avtoritar rejimlərə” qarşı misli görünməmiş maliyyə və ticarət məhdudiyyətləri bu ölkələrin iqtisadiyyatlarının daralmasına gətirib çıxarıb, Qərb mallarına və bazarlarına çıxışı məhdudlaşdırıb. Bununla belə, zaman keçdikcə Çin ticarət əlaqələrini gücləndirərək Amerikanın məhdudiyyətlərinə qarşı çıxmaqda fəallaşıb. WSJ gömrük statistikasını təhlil etdikdən sonra bu qənaətə gəlib. Qəzet qeyd edir ki, ABŞ-nin sanksiyalarına baxmayaraq, yuxarıda göstərilən ölkələr pilotsuz təyyarələrdən və raketlərdən tutmuş qızıl və neftə qədər aktiv ticarəti davam etdirir.
WSJ qeyd edir ki, sanksiya bloku adlanan ölkələrin ticarət ehtiyacları üst-üstə düşür. Bir tərəfdən Çin OPEC-in üç gücündən – Rusiya, İran və Venesueladan nefti ciddi endirimli qiymətlərlə alır. Onlar da öz növbəsində Çindən sanksiyaya məruz qalan malları almaq üçün istifadə edə biləcəkləri mənfəət əldə edirlər.
Rusiya hələ 2022-ci ilin martında tətbiq edilən sanksiyaların sayına görə İranı keçərək dünya lideri olub. Mayın 28-də ABŞ prezidentinin milli təhlükəsizlik məsələləri üzrə köməkçisinin müavini Dalip Sinq bildirib ki, Birləşmiş Ştatlar son nəticədə Rusiya ixracına hərtərəfli embarqoya nail ola bilər. Onun sözlərinə görə, Rusiya “bütün iqtisadiyyatını hərbi maşınlar üçün zavoda çevirir”.
