“The Wall Street Journal”un mənbələrə istinadən verdiyi məlumata görə, eBay Classified-Ads reklam şöbəsini Norveçin “Adevinta AS ADE” şirkətinə satmağı planlaşdırır. Banker.az xəbər verir ki, hal-hazırda tərəflər arasında danışıqlar gedir.
Qeyd edildiyi kimi, razılaşma iyulun 20-də elan edilə bilər. Nəşrin verdiyi məlumata görə, tərəflər müqavilənin dəqiq dəyərini açıqlamaya bilər. Lakin “Bloomberg”in hesablamalarına görə, söhbət 9 milyard dollardan gedir.
İyulun 17-də keçirilən direktorlar şurasının iclasında eBay, bu biznesdə bir paya sahib olmağı üstün tutduğunu bildirmişdir.
Xatırladaq ki, Classified-Ads əsasən beynəlxalq bazarda, bəzi Avropa və Afrika ölkələrinə, o cümlədən Avstraliya və Meksikada işləyir.
Bu platforma istifadəçilərə əmtəə və xidmətlərin satışı elanlarını yerləşdirməyə imkan verir. 2019-cu ildə şirkət Classified-Ads-dan 1,1 milyard dollar gəlir əldə edib.
Qeyd edək ki, eBay-in Classified-Ads şöbəsini satmaqda əsas məqsədi səhmlərinin qiymətini qartırmaqdır. Bu təklif “Elliott Management Corp.” və “Starboard Value LP” fondları tərəfindən irəli sürülüb.
