Yaponiyanın ticarət danışıqları üzrə baş nümayəndəsi Ryosey Akadzava çərşənbə axşamı ABŞ-yə rəsmi səfər etməyi planlaşdırır.
Akadzava Vaşinqtonda keçiriləcək görüşlərdə ABŞ-yə ixrac olunan yapon avtomobillərinə tətbiq edilən tariflərin azaldılmasını tələb etməyi nəzərdə tutur.
Məlumata əsasən, bu addım ötən danışıqlar zamanı əldə edilmiş razılaşmaya əsaslanır. Razılaşmaya görə, Yaponiya ABŞ-yə idxal olunan avtomobillər üçün 15 % rüsum ödəməyə razılaşaraq, Prezident Donald Trampın 25 %-lik rüsum tətbiqi təhdidindən yayına bilmişdi.
Yeni tarif dərəcəsinin avqustun 7-dən qüvvəyə minməsi planlaşdırılır. Lakin avtomobil tariflərinin azaldılmasının konkret nə vaxt həyata keçiriləcəyi hələlik məlum deyil.
Qeyd edək ki, hazırda avtomobil tarifləri 27,5 % təşkil edir. Bu da Yaponiyadan ixrac edilən avtomobillər üçün ciddi maliyyə yükü deməkdir. Yaponiya tərəfi, bu tariflərin aşağı salınmasının qarşılıqlı ticarət əlaqələrinin daha da inkişafına xidmət edəcəyini bildirir.
