Yaxın Şərqdəki münaqişə fonunda Yaponiyada benzinin orta pərakəndə qiyməti rekord səviyyəyə — litr üçün 190,8 yenə (təxminən 1,2 dollar) çatıb. Bu barədə ölkənin Sənaye Nazirliyinin məlumatlarına istinadən “Kyodo News” агентliyi xəbər verir. Qiymətlər martın 18-nə olan vəziyyətə aiddir — bu tarix yanacaq qiymətlərinin sabitləşdirilməsi üçün dövlət subsidiyalarının bərpasından bir gün əvvələ təsadüf edir.
Orta qiymət martın 9-dakı səviyyə ilə müqayisədə 29 yen artıb ki, bu da müqayisə edilə bilən məlumatların aparıldığı dövrdən (1990-cı ildən) bəri ən böyük artım hesab olunur. Əvvəlki maksimum litr üçün 186,5 yen səviyyəsində 2025-ci ilin aprelində qeydə alınmışdı — həmin vaxt zəif yen xam neft idxalının bahalaşmasına səbəb olmuşdu.
Baş nazir Sanae Takati hədəf göstərici kimi 170 yen səviyyəsini müəyyən etmişdi. Yanacaq qiymətlərini sabit saxlamaq üçün dövlət ehtiyatlarından bir hissənin bazara çıxarılması və istehsalçıların subsidiyalaşdırılması planlaşdırılırdı. Hökumətin proqnozuna görə, bu tədbirlər olmasa, qiymətlər 200 yeni keçə bilər.
Martın 19-dan etibarən nazirlik neft məhsulları tədarükçülərinə litr üçün 30,2 yen həcmində subsidiya verməyə başlayacaq. Bu tədbir bir həftəlik müddət üçün nəzərdə tutulur. Nazirlik ümid edir ki, bir həftə ərzində bu addım pərakəndə qiymətlərə təsir göstərəcək.
Dizel yanacağının qiyməti də əvvəlki həftə ilə müqayisədə 28,6 yen artaraq litr üçün 178,4 yenə çatıb. Kerosin isə 507 yen bahalaşaraq 18 litr üçün 2774 yen təşkil edib ki, bu da məişətdə istifadə olunan standart saxlama çəninin həcminə uyğundur.
